Sveppamauk

• 2 box sveppir 

• 2 stk portóbellósveppir 

• 3 hvítlauksgeirar (skrældir)

• 4 skallotlaukar ( skrældir )

Nautalund

• 800-1000 gr nautalund (fullhreinsuð) 

• 1 plata myllu smjördeig 

• 1 msk dijonsinnep 

• 10 sneiðar af hráskinku 

• Sjávarsalt 

• Svartur pipar úr kvörn 

• Ólífuolía 

• 1 stk eggjarauða 

Setjið sveppina, portóbellósveppina, hvítlaukinn og skallotlaukinn í matvinnsluvél og vinnið saman í ca. 20 sek eða þar til allt er orðið smátt skorið. Hitið pönnu og setjið blönduna á þurra pönnuna og steikið þar til vökvinn er farinn úr þeim og þeir eru farnir að gyllast. Setjið blönduna inn á kæli í 30 mín. 

Hitið pönnu með ólífuolíu á og brúnið nautalundina allan hringinn. Penslið hana með dijonsinnepinu og kryddið með saltinu og piparnum. Leggið plastfilmu á eldhúsborðið sem er 40 x40 cm, gott er að leggja nokkrar filmur saman til að ná þessari stærð. Raðið hráskinkunni á plastfilmuna þannig að hún sé nógu stór til að hjúpa lundina. Smyrjið sveppamaukinu þétt yfir hráskinkuna og setjið svo nautalundina inn í miðjuna. Hjúpið nautalundina með skinkunni og sveppamaukinu með því að leggja plastfilmuna varlega yfir nautalundina og rúlla svo plastinu þéttingsfast utan um hana. Setjið rúlluna inn í ísskáp í 3o mín.

Á meðan takið þið smjördeigið og fletjið það út með kefli í stærð sem nær utan um lundina. Takið rúlluna út úr kælinum og takið plastfilmuna af henni án þess að rífa skinkuna af í leiðinni. Setjið á mitt smjördeigið og hjúpið rúlluna með smjördeiginu. Lokið rúllunni í báða enda með smjördeiginu og setjið hana á bökunarplötu með smjörpappír á og passið að samskeitin á smjördeiginu séu undir rúllunni.

Penslið rúlluna með eggjarauðunni, skerið grunnar rendur í deigið með bakinu á litlum hníf – ath. ekki skera í gegnum deigið! Saltið vel yfir deigið og setjið inn í 200 gráðu heitan ofninn í 25-30 mín eða þar til rúllan hefur náð 48 gráðum í kjarnhita. Takið út úr ofninum og látið hvíla í 10-15 min.